Xidmət
0–18 yaş pediatrik qəbul
Pediatrik qəbul uşağın bütün orqan sistemlərini əhatə edən tam baxışdır. Yalnız şikayət olan nahiyə deyil, uşağın ümumi vəziyyəti, inkişafı və davranışı da qiymətləndirilir.
Qəbul nələri əhatə edir
Söhbət və anamnez toplanması ilə başlayırıq: şikayət nə vaxt başlayıb, necə dəyişib, evdə hansı addımlar atılıb. Sonra ümumi pediatrik baxış aparılır — dəri, limfa düyünləri, ağız-udlaq, qulaqlar, tənəffüs və ürək-damar sistemi, qarın nahiyəsi, sinir sistemi. Uşağın ümumi görünüşü və aktivliyi ayrıca diqqət tələb edir: qızdırma düşəndən sonra da uşaq aktiv deyilsə və gözünüzə yaxşı görünmürsə, bu özü ayrıca əlamətdir.
Hansı hallarda müraciət etmək olar
- Qızdırma, öskürək, burun axıntısı, boğaz ağrısı
- Qarın ağrısı, qusma, ishal, qəbizlik
- Qulaq ağrısı və qulaqla bağlı şikayətlər
- Dəri səpkiləri və dəyişiklikləri
- İştahsızlıq, çəki və boy ilə bağlı narahatlıq
- Tez-tez təkrarlanan xəstəliklər
- Valideyndə səbəbi aydın olmayan narahatlıq — bu da qəbul üçün kifayət edən səbəbdir
Yanaşma
Uşağı həkimlə qorxutmaq olmaz — uşaq həkimdən qorxmamalıdır, əksinə, həkim uşaq üçün dost olmalıdır ki, onu narahat edən hər şeyi rahatlıqla danışa və göstərə bilsin. Qəbul bu prinsip üzərində qurulur: əvvəl uşaqla tanış oluruq, sonra müayinə edirik.
Tez-tez verilən suallar
Qəbula hansı sənədləri gətirmək lazımdır?
Əvvəlki müayinə və analiz nəticələri, uşağın peyvənd kartı və hazırda qəbul etdiyi dərmanların siyahısı faydalıdır. Nəticələr köhnə olsa belə, gətirin — müqayisə üçün dəyərlidir.
Uşaq qəbuldan qorxursa nə etməli?
Uşağa əvvəlcədən həkimə gedəcəyinizi sakit dillə izah edin və iynə ilə qorxutmayın. Qəbulda uşağa uyğunlaşmaq üçün vaxt ayrılır.
Qəbul
Uşağınız üçün qəbul vaxtı təyin edin
Zəng edərək uyğun vaxtı dəqiqləşdirin. Qəbul 0–18 yaş uşaqlar üçündür.